Hare husi Intent to Award nebe asinadu Sr Manuel Monteiro no Sr Francisco C Soares nebe hasai iha data 27/8/09 no hatun husi media hotu iha dia 29/809 hanesan fo ona solusaun ba polemika nebe iha durante fulan hirak nia laran entre Assanami no Emilia Pires versus Vice II PM Ir Mario Viegas Carrascalao durante ne’e. Tamba kontradisaun nebe iha mai husi protesta no akujasaun falsifikasaun nebe mai husi MAFF no MoF ba companha Costa Motor. Antes ne’e tender nebe manan husi Global Brothers lda nebe mak lidera husi Yan Suryo Prabowo nebe belun diak ho Ir Mariano Assanami Sabino nebe manan primeiru etapa tender traktor. Segundu etapa mos fo ona ba kompania GB ne’e, maibe iha kontradiksaun no protesta husi empresarius nasional nebe hamusu desentidementu no deskunfiansa husi PM Xanana nebe fo instrusaun ba Vice II PM Ir Mario hodi kancela tia tender refere no halo re-tenderisasaun ikus nebe munu ba Costa Motor no halo Assanami la satisfas no la simu dejisaun refere. Nufin, loby nebe halo husi Dili - Surabaya husi MAFF-MoF kontra fali companha Costa Motor no desisaun Vice II PM hamusu polemika bot liu tamba ho akujasaun ba falsifikasaun dokumentu husi kompanha iha Indonesia kontra kompanha Costa Motor. La hatene osan hira mak gastu uja ba loby atu halo akujasaun ida ne’e. Informasaun (lakonfirmadu) nebe mak ema hotu hatene katak Global Brother hatama tia ona traktor balun nebe mak sai hanesan forsa atu manan tender no aumenta tan “loby” nebe nia konfia los atu manan tan tender ne’e hanesan belun diak ho ema nebe mak iha forsa atu hasai dejisaun.Konflitu bo'ot ida ne'e resolvidu tamba iha intervensaun dreita husi PM Xanana ba kaju ida ne’e tamba nia lakohi polimika ne’e sai bo’ot liu no bele hamosu konflitu interese entre bloku AMP nia laran nebe mak ukun dadaun. Ho rajaun ida ne’e, dejisaun foun tun no kontratu ba tender traktor nebe nia valos USD$8,2 Milloens munu ba kompanha rua ne’e hotu ( Global Brother Lda: $ 5,6 Milloens no Costa Motor Lda; $2,6 Milloens).
Iha parte seluk atu empresarius nasional para labele “halo an” demais PM mos ho inisiativu liu husi colaborasaun ho Associacao dos Empresarios de Timor Leste nebe lideradu Sr Julio Alvaro fahe ona projetus ba fulan hat nian ba Empresarius local (pakote referendum) ho montante total $30 Milloens nebe mos hamosu kritika husi partidu balun tamba la tuir regimentu esekusaun orsamentu estadu no lei (stl 3/9/09). Projetus ne’e ba area infrastruktura, Saude no Educasaun, maibe empresarius sira sei halo projetu fulan hat nian ne’e ho laran taridu tamba karik sira sei hetan “black list” bainhira la kompleta projetus ne’e antes dia 31 de Desembru 2009. (pm-ed)
